Анастасия Тутаева
Удмурт Image

Анастасия Тутаева

476 {num}

Анастасия Тутаева – «Мынам Удмуртие» телерадиокомпаниысь журналист, «Шунды» огазеяськонлэн правлениезлэн ёзчиез. Вордскемын Дэбес ёросысь Заречная Медла гуртын. Йылпумъяз Удмурт кун университетысь удмурт кылосбуръя, финно-угроведениея но журналистикая институтэз.

Дышетскон

Пичи дыръям атае  архитектор луыны косэ вал, угось мон суредаськон, 
геометрия предметъёсты яратылӥ. Нош сюлэмы гожъяськон  борды кыстӥськиз. Кема малпаськыса, удмурт кылосбуръя факультетысь венгер группае пыри. Мон сямен, та ӧнер паськытгес –  дышетӥсь, 
гожъяськись, берыктӥсь, журналист луыса астэ эскерыны быгатӥськод. Со сяна, пӧртэм кылъёсты дышетыны но кун сьӧры потаны луонлыкъёс вань. Нырысетӥ курс бере ик одӥг толэзьлы Венгрие мынӥ. Нырысь туж секыт потӥз. Угось соку англи но венгер кылъёсты лябгес тодӥсько на вал. 
Али шумпотӥсько, сюрес вылам умой адямиос сюризы, соос юрттӥзы, 
азьланезлы оскон пыӵатӥзы. 

Журналистика

Школаын дышетскыкум кылбуръёс гожъяй.  Али чуръёс малы ке но  
уг ни вордӥсько. Йырын кыӵе ке малпан кылдӥз ке но, сое гожтыны дыр 
висъяны луонлык уг кылды. Журналистикаен эшъяськонэ «Байгурезь» 
газетэ  гожтэм уж  бордысен кутскиз. Собере дышетскыны пырем берам практикаосме «Мынам Удмуртие» телерадикомпаниын ортчи. 
Мыным телевидениын ужаны тунсыкогес потэ. Сямыя мон небыт, 
возьдаськись, востэм но гань-гань. Одӥг паласен со умой, нош туала улонын ваменэс но луыны кулэ. Соин ик камера азьын ужаку но тодмотэм 
муртъёслэсь интервью басьтыку лякыт сямъёсты 
палэнтоно, угось лэсьтыны косэм сюжетэз одно ик пумаз-йылаз вуттоно. 
Улонын котьма луэ, нош та ужен мынам люкиськеме уг поты. 

Чеберай нимтуллы вожвылъяськонъёс

Малпасько, котькыӵе ныллэн выжыкылъёсысь кадь  принцесса, 
чеберай яке мусокай луэмез потэ, дыр. Мынам но сыӵе дыръёсы луизы. «Чеберай–2014» вожвылъяськонэ пыриськыны дэмлазы. 
Мон туж шумпотӥ. Бен, шуг-секытъёсыз но вань вал. Нырысь ик сценалэсь но микрофонлэсь курдай, эктыны но кырӟаны бадӟым быгатонлыкъёсы ӧй вал. Но берлань вамыштыны уг яра, астэ умой паласен гинэ возьматоно. Вань куронъёсты быдэсъяй, тыршыса но сюлэмез сётыса ужъёсты лэсьтылӥ. Аслам гожтэм кылбуръя но крезьгуръя ӵош дышетскись Артём Гавриловен кырӟан быдэстӥмы. Тыршеме огшоры ӧз луы – вормисе потӥ. Модельной агентствое ветлэме но туж юрттӥз. Сцена вылын чебер ветлыны,
сылыны, тыбырез возьыны та выллем вожвылъяськонъёсын 
туж кулэ макеос. 

«Мисс студенчества финно-угрии»

Та вожвылъяськонэ пырыны Алина Антонова ӵектӥз. 
Тунсыко потӥз но пыриськи. Командае  туж умой вал ке но, та вожвылъяськон мыным туж секытэн сётӥськиз. Отын ваньмыз огыр-бугыр, кытчы, мар, кызьы – номырзэ валаса вуыны ик ӧз луы… Малпасько, мон асме кутыны ӧй быгаты. Со вакытэ сюлмаськон но курдан мылкыдъёсы кужмогес луиллям. Отчы пыриськемлы мон уг ӧкынӥськы. Со одӥгез асме эскерон ужрад вал.

Тунсыкъяськонъёсы

Мон вуриськыны яратӥсько. Та уж зэмзэ но мынам 
шуыса валай, куке анай вуриськон машина кузьмаз. 
Вуриськыкум шутэтскисько, шуг-секытъёсын люкиськисько. Мынам семьяям но нылкышноос усто вурисько. Оло, соос выжые мынӥськем. Жаляса верано, туннэ нуналлы ӵемысь 
вуриськыны дыры уг тырмы.  Азьланяз одно ик пичи нылъёслы дӥськутъёс вуреме потэ. Пичи нылы луиз ке, одно ик анаезлэн вурем чебер дӥсьёсыныз ветлоз.

Азьланезлы малпанъёсы

Азьланез сярысь вераны но кышкыт… Дышетсконме 
кытын ке азьланьтыны но тодон-валанъёсме муромытыны мылкыды вань. Нош кыӵе ӧнере дышетскыны пырыны ачим но уг тодӥськы на, малпаськисько. Тодӥсько, яратоно ужен 
люкиськыны уг быгаты. Туннэ нуналлы мынам нырысетӥ 
интыын уж но семья. Отӥяз, адӟом мар луоз…