Анна Образцова
Удмурт Image

Анна Образцова

1495 {num}

Анна Образцова Удмурт кун университетысь искусствоосъя но дизайнъя факультетын куинетӥ курсын дышетске. Суредаськонэн сяна, тунсыкъяське крезьгур дуннеен. Солэн кырӟанъёсыз пыремын ини «Камали-2013» нимо диске. Озьы ик Анна яратэ сцена вылын пӧртэм рольёсты шудыны. Университетысь «Огни большого вуза» театре шумпотыса ветлэ. Нош ваньмон дыръяз аслыз чебер дӥськутъёс кылдытъя.

Доре. Пичи дыры

Вордӥськемын мон Алнашын, собере семьямы Дэбесэ улыны выжиз. Гуртме яратӥсько, отын инкуазез кужмо но таза, бертӥсько ке, пушкам ваньмыз каньылак луэ. Пичи дырысен лыдӟиськонлы но сикетӥ ветлонлы яратон пыӵаз. Трос кылылӥ, кыӵе кышномурт но пиосмурт луыны кулэ, кызьы ог-огзэс данъяса улыны кулэ. Улонын мар быгатыны кулэ соос, яке малы уг яра мукетъёсты уродэн вераны.

Суредаськон сярысь

Суредъёс пыр адямилэн пушказ шуныт пыртэм потэ, форма но буёлъёс пыр каньыл мылкыд кузьмаме. Соин туж яратӥсько акварелен ужаны, озьы ик графической материалъёсты ватсаны тыршисько. Буёлъёс пӧлысь бырйисько лыз, тӧдьы, курень, вож но сьӧд. Со ласянь, конечно, котькудӥзлэн аслаз малпанъёсыз но ассоциациосыз кылдо, но, мон оскисько, соос Инкуазьлы матын.

Быдӟым суредаськисьёс пӧлысь яратӥсько Врубельлэсь, И. Репинлэсь но Ци Байшилэсь ужъёссэс. 

Анна Образцова

Дуннеез адӟон

Туж потэ ветлэме Японие но Китае, малы ке шуоно со палась культура тунсыко потэ — идеологизы, философизы, улонлэн черодэз — ваньмыз мукет. Оскисько, та кунъёсы ветлыса, мукет сяменгес суредаськон удысме азьланьтыны пӧрмоз. Дуннеез адӟон — верантэм тунсыко, со бадӟым опыт но луонлык сётэ. Быгатысал ке, али ик кошкыны мукет музъемъёсты адӟон понна, нырысь ик Китае, собере Индие мынысал, эшшо туж потэ учкеме, кызьы зэмзэ Англиын но Ирландиын уло. Та музъемъёсын туж утё культуразэс. Улыны отчы ӧй кыльысал, тодон-валан понна ветлысал, мукет сям-йылолъёсты адӟем потэ. Нош собере Удмурт шаере ик бертысал.

Кырӟан удысэ

Пичи дырысен ик ӵыжы-выжыосы сцена вылэ кырӟаны поттылӥзы, сыӵе дыръя аслым но кельше вал. Али кырӟаны яратонэ ӧз воштӥськы.

Школаын дышетскыкум ветлӥ духовой оркестре, кырӟаны дышетски. Бергес синмаськи флейтаен шудонлы. Кӧня ке дышетски шудыны блокфлейтаен. Гитарен шудыны но выри ас поннам, нош али одӥг аккордзэ но уг тодӥськы ни.

Кырӟан удысын туж бадӟым тау потэ верам «Камали» студилы, малы ке шуоно отын уг туртто воштыны со малпанъёсме, кудзэ мукет адямиослы возьматэм потэ кырӟан пыр. 

Крезьгуръёс пӧлысь фолк-рок, инди, кӧня ке кантри но вашкала гуръёсты кылзӥсько. «ПтицаТылобурдо», «The Band Perry», «Florence and the machine», «Мельница» но «Белая Гвардия» крезьгурчиосты яратӥсько.

Театр сярысь

Театр сюлэмылы матын. Учкыны но шудыны луонлык ке шеде, шумпотӥсько.

«Огни большого вуза» азинсконэ нырысетӥ курсысен пыриськисько. Нырысетӥ курсын главной героиняез шудӥ — со вал сумасшедшая художница. Секытэн сётӥськиз, бӧрдыса-бӧрдыса. Ачим сыӵе факультетын дышетскисько бере, уг поты вал сыӵе ик улонэз адӟеме. Собере буйгай но яратӥ со ролез, ачим но улонын чурытгес но кужмогес кадь луи. Кыкетӥ курсын ачим пьеса гожтыны оскалтӥ — таиз но уж туж тунсыко потӥз.

Сюлмаськонэз вал трослы зол: кызьы адӟемме шудӥсь адямиослы валэктыны? Мар учкисьёс валалозы? Со курсысен ик шудӥ Т. Уильямслэн пьесаысьтыз валтӥсь рользэ. Со вал дас куинь аресъем семьятэк кылем нылаш. Таиз но роль сюлэмшугъяськонъёс кузьмаз, озьы ке но, трос дыр ортчыса, мон али но синмаськемын та пьесалы.

Куинетӥ курсысен но одӥг нылашен ӵош пьеса малпамы. Отын шудӥ персонажез, кудӥз адямилэн возьытэзлы тупа. Кытысь ке лыдӟи вал, шудэм рольёс — со «используемые в будущем модели поведения». Адями, кудӥз шудӥз яке шудэ, шуг-секытэ шедьыкуз, йыраз бергатыны кутске: нош кызьы мынам герое карысал? Угось роль пыӵаз ини адями пушкы, адямилэн люкетэз луиз ини. Соин адямилэн шуг-секытысь потон амалэз — малпам персонажлэн ӧвӧл, аслаз малпанэз луэ.

Анна Образцова