Анна Пислегина
Удмурт Image

Анна Пислегина

227 {num}

Анна Пислегина – Тол Бабайлэн егит юрттӥсез. Вордскемын Шаркан ёросысь Вортчино гуртын. Йылпумъяз Удмурт Элькунысь культурая колледжез «Театральной творчество» специальностья. Али Санкт-Петербургысь гуманитарной университет профсоюзын «Менеджер социально-культурной деятельности» удысын тодон-валанзэ муромытэ. «Усадьба Тол Бабая» центрын менеджер луыса ужа.

Пичи дыръя бадӟым малпанъёсы

Пичи классъёсын дышетскыкум, археолог луыны мылкыды вал. Египетысь динозаврез шедьтон понна! Али мыным со серем гинэ потэ ни. Пичи дыръям сцена вылын шудыны яратӥ, театральной кружоке ветлӥ. Синмез басьтымон, тунсыко но чебер дӥськутъёс кельшылӥзы. Соку валай, мар мыным кулэ, кытын дышетсконо, кин луоно. Нылпи дыръям кумиръёсы – тодмо кизилиос пӧлысь адӟем карымон адямиосы  – ӧй вал. Мон ачим аслым  кузё, азьветлӥсь.  

Кылбур гожъян

Куке мынам апае нырысетӥ кылбурзэ гожтӥз, мыным со тунсыко потӥз.  Ас поннам малпай, мон но быгато шуыса. Озьы ке но, кылбур борды ӧй кутскы. Мае ке возьмай… Школаысен доре уж сётӥзы – серемес учырен герӟаськем кылбур гожтыны. Ачим ик шӧдытэк, выйи кылбуранэ. Владимир Котков огпол лыдӟиз  гожъямъёсме. Нылпиослы бичет поттыны, пе, луоз. Малпасько, та кылъёс  быдэсмозы. Али ӵемгес  ужам кулэ дыръя кылбурасько.

Выжыкылын кадь…

Колледжез йылпумъяме бере Шаркан ёросысь лулчеберетъя юртын ужай. Соку ик нырысьсэ Тол Бабаен, кунгож сьӧрысь куноосты  пумитась ӵектосэн тодматски. Та выль но пумен будӥсь ужрад мыным туж кельшиз. Нош  Усадьбаын вакансиос чик ӧй вал.  Мон нырысетӥосыз пӧлын, кин Тол Бабай дорын ужаны кутскиз. Соку лыктэм куноос ӵем юаллязы: «Тон Лымы ныл шат?»  Серекъяса шуисько: «Ӧвӧл, Тол Бабайлэн юрттӥсез». Толалтэ но гужем Тол Бабаен Лымы ныл пичиосты шумпотто. Юрттӥсьёс но куноосты шумпоттон ужын бере уг кылё. Тол Бабай доры Усадьбае но, Лымы ныллэн Лымыпыры лэсьтон коркаяз но вуо. Со интыяськемын Титово гуртын.   Нош гужем вуэмен тунсыко но етӥз  ужрадъёс уг ичиёмо. Вань мылкыд карисьёс пиналъёссэс ваё, валче шутэтско, пайдаен дырзэс ортчыто. Выжыкыл ноку уг быры! 

Тунсыкъяськонъёсы

Анае вуриськыны но керттӥськыны дышетӥз. Нырысь та киужъёс тунсыко уг пото вал. Нош али шумпотӥсько но паймисько, йырам кылдэм малпанъёс, киосы ужам улсын, улонэ пыӵало шуыса.  Выль кылдэм арбери мылкыдэз ӝутэ, выль ужъёс борды кутскыны бурдъятэ. Со сяна, туж яратӥсько лыдӟиськыны.   Куке «Петр I» романэз лыдӟи, воксё со пушкын улӥ кадь. Книгаез лыдӟеме бере, оло, зэмос улон но быриз кадь потӥз.

Мон  сцена вылын

Мон сценаен  герӟаськем ужъёсты яратӥсько. Театр удысын нылпиосты дышетӥсько,  удмурт но ӟуч кылъёсын ужрадъёс нуисько. Озьы ик театрализованной возьматонъёслы  сценарист но режиссёр луыны кельше. Малпасько, мон шонер ӧнеръёсты бырйи. Сцена вылын трос малпанъёсме быдэсто на… 

Зэмос удмурт ныл – со…

Мон сямен, удмурт нылаш аслаз востэменыз чебер. Котькудӥзлэн сыӵе сямыз поталля, куддыр витьымтэ шорысь но. Удмурт ныл – выльзэ эскерыны, кышканъёссэ вормыны  но ас бордаз кыскыны быгатӥсь мусокай.  Малпасько, монэ  пичияк зэмос удмурт ныл шуыны луоз.