Богдан Анфиногенов
Удмурт Image

Богдан Анфиногенов

1454 {num}

Богдан Анфиногенов – кылбурчи, кырӟась, УИИЯЛ УрО РАН-ысь аспирант. Вордскемын но будэмын Пичи Пургаын. Удмурт кун университетысь исторической факультетэз йылпумъяз, али АУК УР «Калык творчествоя элькун корка – Егитъёслэн юртазы» методист луыса ужа.

– Богдан, тынад трос проектъёсыд. Мар бордын али ужаськод?

– Нырысь ик, Интернетын ӵем пукисько, тужгес но Контактын. Соин проектъёсы отын кылдо. Удмурт кылын кылбуръёсме но отын нырысь поттӥ. Али дыре вань ньыль проектэ – «Удмурт кылбурчи», «MTV Udmurtia» паблик но кык крезьгуро проект: Ullapalla Boy (удмурт coverъёс, дуннеысь хитъёсты ас сямен, удмурт шӧмо лэсьтон) но Мурӝол Underground (хип-хоп проект, кытын мон лыдӟисько рэп, крезьгурзэ шарканысь диджей – Павел Перевозчиков (T.D.A.-B.) – лэсьтэ). Та проектъёс пыр вуж удмурт кырӟанъёсты улӟытӥськом, социально темаосты ӝутӥськом (текстъёс билингвистичноесь, ӟучо-удмурто, англи-удмурто но мукет), нош Олеся Дыдыкай (Олеся Полатова) та проектлэн ныл куараез, ныл тусыз, со но туж юрттэ мыным).

Богдан Анфиногенов

– Маин удмурт эстрада бордаз кыске?

– Сцена мыным сётэ эрик-а, мар-а. Угось огшоры улонын мон туж востэм, возьдаськись адями, ас поннамгес, нош сцена вылын – мукет, шулдыр.

– «Амисо Вот» группаен тон нырысьсэ сцена вылэ потӥд. Улонад та вакыт кыӵе пытьы кельтӥз?

– Cо вал туж шулдыр, капчи, тунсыко дыръёсы. Мон понна та эрико вакыт, куке мылкыдыя кылбур чуръёсме кырӟанъёслы пӧрмытылӥм. Ӵапак та вакытэ пӧртэм хитъёсты удмурт сямо лэсьтыны кутски. «Амисо Вотын» вал туж тунсыко адямиос – Рома Васильев, Коля Смирнов, Влад Степанов, Женя Бикузин, Петя Пушкин. Али но соос калыклы тодмоесь! Группаын мыным кельше вал соиз: лэсьты, мар тынад потэ, нокин шоры учкытэк.

Богдан Анфиногенов

– Мар тонэ синмаськытэ?

– Монэ синмаськыто: удмурт куиськон, орнаментъёс, пужыос, удмурт кылъёс, чебер удмурт нылъёс, авангард поэзия (ӟуч футуристъёс, кылсярысь), синмаськытэ этнофутуризм малпан. Синмаськыто выль удмурт проектъёс, кудъёссэ лэсьто Поздеев, Дарали, Лёша Шкляев но трос мукетъёсыз. Чудья Промо – али бурдъятэ (Мария Векшина, Марина Сергеева (блогеръёс), Таня Тихонова (дизайнер, крезьчи, «Чипчирганысь» кырӟась-эктӥсь), Лиля Леонтьева, Женя Бикузин (суредась-этнофутурист) – мыным кельше соосын вераськыны.

60-тӥ аръёс мыным туж кельшо! Малпамея, со вал эрико, тужгес романтичной но чебер дыр та дуннеын. Мон сыӵе адями – мыным туж кулэ чебер обложка, фантик, блестяшка-а, мар-а, мыным тунсыко туала арбериос.

Богдан Анфиногенов

– Тодӥсько, удмурт кылэз быдэ вуэмед бере дышетыны кутскид. Кызьы кылбуръёсыд вордско?

– Вань сыӵе кылъёс, кудъёсыз мыным туж кельшо, нош вань чылкак кельшисьтэмъёсыз. Удмурт кылын но вань сыӵе кылъёс. Кылбур кыл бордысен улӟе, та кыллы шедьтӥськод ке рифма, всё – кылбур ачиз мыноз. Удмурт кылэз дышетыны кутскыкум, туж трос чебер удмурт кылъёс шедьтӥ, кылӥськемзыя соос кыӵе ке аспӧртэмесь. Та кылъёс бордысен кутски кылбураны. Нош удмурт кылэз умой тодымтэеным, соос ӟучо-удмурто пӧрмизы.

– Удмурт пространствоын мар уг тырмы кадь тыныд потэ?

– Мыным уг тырмы национальной СМИ: котьку мед быгатысал удмурт передачаос учкыны, выль клипъёс, иворъёс. Киоскысь «Инвожоез» яке «Дартэз» котькуд адями басьтыны мед быгатысал. Карын удмурт лулчеберет удыслэн ужез умой мед радъямын луысал. Льӧль малпанэ: куке но выль, чылкак удмурт кар мед кылдысал, зэмос удмурт сям-йылолъёсын. Ижкар уг тупа таӵе интылы, солэн аслаз заводской историез. Мынам дипломе но та темалы сӥземын вал «Этнофутуризм но удмурт культура XXI даурын» (кивалтӥсе Прокопьев Андрей Николаевич). Нош али аспирантураын «Этнофутуризм как культурное явление народов Урало-Поволжья» темая диссертация гожтӥсько (кивалтӥсе Никитина Галина Аркадьевна).

– Удмуртлык пуштросэд пичи дырысеныд маин герӟаськемын?

– Тодэ ваёнъёсысьтым, пичи дыръям, Арлан гуртын ӵужанае дорын куноякум, ӵем удмурт кылэз кылзӥ. Евгения Медведевалэн но Людмила Ахтариевалэн «Уллапала» кырӟамзы сюлмам пыӵаз, солы луыса ик кылдӥз Уллапала Бой псевдониме.

– Ӵемысь Интернетын егит удмуртъёс огазеяськон сярысь верасько, тынад кыӵе малпанъёсыд та пумысен?

– Кыӵе ке огазеяськон кулэ ик, малпасько. Федеративной со мед луысал. Нош али Интернет ваньзэсты герӟа. Мыным туж кельше туала егитъёслы удмурт культура: милям вань модельёсын ужасьёсмы (Mademoisele Oudmourte, Полина Кубиста, Дина Derem, Ольга Вужер, Надя Сапожникова, Ксюша Чимали но мукет), вань «Перепечкин» удмурт кафемы, вань кино лэсьтӥсьёсмы («Инвис кинопоттонни»), вань СМИ («Инвожо», «Дарт»), вань удмурт ӝытъёс, культрегеръёс (Поздеев, Дарали, Шкляев), вань концерт лэсьтӥсьёсмы (Эктоника, Кечол ӝытъёс). Интернет та удысын валтӥсь инты басьтэ.

Богдан Анфиногенов

– Пичи дырысен удмурт кылэз ӧд дышеты бере, анай кыллэсь кулэлыксэ ас вылад ку шӧдыны кутскид нырысьсэ?

– Милям «А» классамы дышетскизы Миндэргуртысь пиналъёс, соослэн удмурт кылъя но литературая урокъёссы вал. Нош ми покчи классъёсын удмурт кылэз одӥг ар факультативно дышетӥм, но номыр но тодам уг вайиськы со дырысь. Мыным туж возьыт луиз, куке ас вылам кулэлыксэ шӧдӥ. Со вакытэ Электроникъёслэн ремиксъёссы потӥзы, «Юмшан промо» зол ужа вал, «Silent Woo Goore» группа кылдӥз – со вал туж аспӧртэм, модно, тунсыко. Со монэ туж паймытӥз: удмурт культура сыӵе туала вылэм шуыса. Пичи Пургалан улыкум, телевизор пыр адӟи та направлениез, кыӵе ке валан кылдӥз пушкам, со мыным туж тунсыко шуыса. Та дыре ик удмурт книгаосты лыдӟыны кутски. Пичи Пурга библиотекаын удмурт книгаос трос вал, отысь ик удмурт-ӟуч кыллюкам басьтӥ, пыр-поч сое лыдӟи, удмурт кылмес дышетыны кутски ас поннам. Нош куке мон лыдӟи Маргарита Гришкиналэсь «Удмурты: этюды из истории IX–XIX в.в.» книгазэ, мынам пушкам зэмзэ ик мар ке но бугырскиз! Сыӵе зол мыным возьыт луиз, мон удмурт, нош ачим удмурт сямен вераськыны уг быгатӥськы шуыса, туж урод мыным вал. Озьы ке но мылкыды ӝутскиз, кутски удмурт кылэн, удмуртлыкен тунсыкъяськыны.

– Али удмурт кылэз школаосын дышетон сярысь ужпум туж сюлэмшугъяськытэ калыкмес. Та сярысь кыӵе малпанъёсыд?

– Мон малпасько, со валтӥсь проблема. Удмурт этнослэн лыдпусэз кулэсме. Нош тросэз азьветлӥсьёсмы калык азьын удмурт кылын шонертэм верасько. Удмурт конституциын гожтэмын: «Удмурт кыл – кун кыл». Удмурт кылэз дышетон – одно ик кулэ! Мон – яркыт пример. Школаын ӧй дышеты анай кылме, нош озьы ке но – мон удмурт!

Богдан Анфиногенов