Иван Белослудцев
Удмурт Image

Иван Белослудцев

1263 {num}

Иван Белослудцев – туала егит кырӟась, крезьгурчи. Вордскемын Кез ёросысь Александрово черко гуртын. Туннэ Иван УдГУ-ысь удмурт кылосбуръя факультетын дышетске.

Крезьгур дунне но удмурт кыл

Мон пичи дырысен ик кырӟасько ини, но улонэ кырӟанэн герӟаськоз шуыса уг ик малпаськы вал. Ваньмыз кутскиз со вакытэ, куке монэ атае гитараен шудыны дышетӥз. Мыным туж кельшиз, соин ик котькуд нунал шудыны кутски. Анай-атае музыкальной училищее дышетскыны пырыны дэмлало вал мыным. Мон ачим но малпалляй отчы мыно шуыса. Но шӧдтэк шорысь удмурт кылосбуръя факультетэ дышетскыны пыри. Татысен кутскиз мынам музыкальной «карьерае». Зэмзэ вераса, гуртын улыкум, удмурт кылэз сыӵе вылӥ интые уг пуктӥськы вал. Факультетын кӧня ке дышетскыса, мон туж гажаны кутски анай кылме, валай, макем со чебер но кужмо.

Кырӟанъёс гожъян

Тросгес кунгож сьӧрысь музыка кылзӥсько бере, кырӟанлэсь кылъёссэ удмурт кылын гожтӥ, нош гурез кунгож стилен мед луоз шуса малпай. Озьы нырысетӥ курсысен мон кырӟанъёс гожъяны кутски. Собере «Вконтакте» вотэсэ, асме диктофонэ гожтыса, вӧлмытӥ. Калыклы кельшиз выль шӧм, тросэз тунсыкъяськыны кутскизы. Одӥгез сюлэмшугъяськытэ: мынам нокыӵе музыкальной образование ӧвӧл, со туж люкетэ крезьгур гожъяны. Малпасько дышетскыны куке но.

«Ivan Belosludcev & 4 Cheber Pios»

Кызьы ке шуак кылдӥз «Ivan Belosludcev & 4 Cheber Pios» группа. Мыным, гуртысь лыктэм пияшлы, зоопаркысь пегӟем маймыллы кадь, ваньмыз выль но тодмотэм потэ вал нырысь. Собере дыши, пиосын огкыл шедьтӥм но музыка лэсьтыны кутским. Мон гожтӥсько кырӟанъёс, соос инструментъёсын аранжировка лэсьто. Туж визьмоесь но ас ужзэс тодӥсесь музыкантъёс. Ми ӵош Испание «Евровидение малых народов» вожвылъяськонэ ветлӥм.

Выль проект

Мон уг малпаськы вал, куке но кинлэсь ке кылбурзэ кутыса кырӟан лэсьтыны быгато шуыса. Но луиз озьы: мон «Электроникъёсын» но Мария Галееваен тодматски. «Творческой кризис» дыръя мынам одӥг кырӟан но гожтэме уг луы. Огаз сыӵе вакытэ тодам ваи, куке но Маша мыным кылбурзэ келяз вал. Малпай солэн кылъёслэсь кырӟан лэсьтыны. Та кылбурен «Электроникъёс» доры мынӥ, озьы кылдӥз нырысетӥ кырӟан но выль проект. Таӵе крезьгур направлениен ужаме ӧй вал на, соин ик тунсыко потӥз. Калыклы но кельшиз кадь.

Ваньзэ ӧй вера, ӧй но кырӟа на…

Олокыӵе но малпанъёс вань йырын, оскисько ваньмыз быдэсмоз. Кырӟаны но гитараен шудыны туж яратӥсько, ноку уг кушты со ужме. Троссэ ӧй вера, тодэмды потэ ке, юалэ аслэсьтым…