Ксения Кадрова
Удмурт Image

Ксения Кадрова

1398 {num}

Ксения Кадрова – туж тунсыко удмурт нылаш. Со вордӥськемын Пурга ёросысь Пуро-Можга гуртын. ИжГТУ-ысь «Управление качеством» факультетэз йылпумъяз. Со университетын ик дышетскиз кылысь кылэ берыктӥсьлы. Немец кылэз ӟечгес тодон понна, ӝыны арзэ Германиын улӥз. Али Ижкарын инженер луыса ужа.

Семьяе сярысь

Вань ӵыжы-выжыосы мыным семья кадь пото, мон понна соос туж дуно. Атае быдэс улонзэ совхозын ужамын, нош анае – дышетӥсь, УдГУ-ысь ӟуч филология факультетэз йылпумъямын. Али школаын ӟуч кыл но литература, обществознание предметъёсты нуэ. Вань на выны – Вова... Семьяе мыным идеальной потэ, асламез но сыӵе ик мед луоз вал.


Быръем профессие сярысь

Малы мон инженер луи? Озьы пӧрмиз, озьы кулэ, дыр, вал. Асме мукет удысын уг адӟиськы ини.

Нокызьы но валаны уг быгатӥськы: малы инженер профессиез нылмуртлы тупасьтэм шуо! Монэн ӵош туж трос нылкышноос ужало. Соос пӧлын трос умой специалистъёс вань.

Уже сярысь

Мыным уже туж тунсыко потэ. Ми боевой машинаослы электрон блокъёс бичаськомы. Мынам валтӥсь уже – техпроцессэз гожъян: кызьы электрон блокъёсты шонер бичано. Отын аслаз технологиосыз вань.

Мае лыдӟыны яратӥсько?

Анае туж трос лыдӟиськемын, троссэ – ӟуч классикаез. Ӝытъёсы ми кыӵе ке произведение сярысь вераськыса пукылӥмы. Соин пичи дырысеным ик яратӥ лыдӟиськыны. Книгаосы котькытын кыллё вал, валес улын но! Анае классика лыдӟыны дышетӥз, нош атае приключенческой литературалы яратон пыӵатӥз. Гуртамы библиотекамы вань, отысь индеецъёс сярысь вань книгаосты лыдӟи. Лыдӟиськыны али но яратӥсько.

Германия сярысь

Кунгож сьӧры одӥг пол гинэ потаме вань – Германие. Ӝыны арлы гинэ. Отын улыны туж секыт вал мыным. Немецъёслэн улон-вылонзы, сям-йылолъёссы сюлмылы ноку но уз тупалэ. Удмуртъёс востэмесь ке но, шуныт сюлэмен пумитало. Германиын ке – котькытын «американ пальпотон». Мар ватӥське со сьӧры? Кин тодэ…

Мыным туж кельше вуылыны мукет интыосы: пӧртэм городъёсы, шаеръёсы. Куддыр интыез воштон туж кулэ.

Азьланезлы малпанъёсы

Азьланез сярысь вераны но кышкыт! Али мон понна карьера нырысетӥ интыын, уж мед ужаськоз кадь потэ.