Максим Князев
Удмурт Image

Максим Князев

1348 {num}

Максим Князев — Удмурт калык театрысь егит артист. Вордскемын Балезино ёросысь Исаково гуртын. Йылпумъяз Щепкин нимо театральной училищеез. Удмурт театр сцена вылын пӧртэм рольёсты быдэстэм сяна, валтӥсь рользэ шудыса вуттӥз ини «Пузкар» фильмын но. Со сяна, солы удалтӥз Москваын «Неравный брак» но «Пятая стража» сериалъёсын но шудыны.

Москва дыръёс

«Щепкаын» дышетскыкумы, милемлы студентъёслы одно ик музее яке театре ветлоно вал. Мае но адӟыса ӧй вуы! Искусство шоры мукет синмын учкыны кутски. Трос выль тодматсконъёс, тунсыко адямиос, Москваысь артистъёс — ваньмыз со али туж юрттэ мыным пӧртэм типажъёсты но характеръёсты шудыны. Отын, пӧртэм вожвылъяськонъёсы пыриськем сяна, «Неравный брак» но «Пятая стража» сериалъёсын шудыны вуттӥ

Театр но кино

Зэмзэ ке, театрын калык пӧлын ужаськод, синмысь синме, кылӥськод-шӧдӥськод мылкыдзэс, пумитамзэс. Нош киноын одӥг дубль, кык дубль… монтаж лэсьтыса, соос пӧлысь мар ке пӧрме. Киноын ӝог луоз пӧрмытыны пӧрмытымтэмзэ, нош театрын мукет шӧдон — котькуд минутэ сюлэм тулкымъяське. Станиславский куке но шуиз вал: «Театр — храм, актер — жрец; священнодействуй или убирайся вон!»

Дышетӥсе сярысь

Улонамы асьмеос пӧртэм сямо адямиосты пумитаськомы. Соос пӧлын зэмзэ ик дано адямиос пумиськыло, кинъёс калык понна улонзэс жалятэк тыршо. Москва карын но мон пумитай туж паймымон адямиез. Со вал милям художественной кивалтӥсьмы Дмитрий Георгиевич Кознов. Со войнаез ортчем, куинь вылӥ образованиез, Россиын буёло телевидение усьтэм. Солы 88 арес тырмиз ини, нош али ке но Щепкин нимо училищеын дышетэ.

Максим Князев

Удмурт театр но рольёс

Али Удмурт театрын «Эмезь кисьмаку» спектакльын эмеспиез шудӥсько, «Горе от ума» пьесаын — Петрушкаез, «Недоросльын» — Вральманэз. Мыным кельше история, соин ик туж потэ кыӵе ке но исторический персонажез шудэме, шуом, Борис Годуновез (кӧня ке дыр ортчыса), Шекспирлэн пьесаосысьтыз кудзэ ке геройзэ мылкыды вань шудыны. Характерной рольёс пӧлысь кельше Яго (Отелло).

Малпанъёс

Зэмзэ ке, туала театрез шаерамы азьланьтэме потэ. Москваын оломар но туртто пуктыны, эксперимент нимало, тани «Чайкаез» али дыре но лэсьто. Тыл зол ужа, кыӵе ке техника спектакле пырто, ваньмыз берга, ӝутъяське, оломар но луэ. Но куке но Юрий Соломин шуиз вал: «Котькӧня мед мынозы со экспериментъёс, кытын мат кылӥське, гольык адямиос сцена вылтӥ бызьыло, но озьы ке но ваньмыз берытскоз классика вылэ». Классика вылын дышетскыны кулэ. Кылсярысь, «Горе от ума» спектаклез басьтоно ке, дауръёс ортчемын ини, нош проблемаос сыӵеесь ик, номыриз адямилэн ӧз воштӥськы.

Учкисьёс сярысь

Нырысь ик, со мынам анай-атае. Соос залын пуко ке, мон котьку тулкымъяськисько… Зэмзэ ке, монэ туж малпаськонэ уськытэ: калыклэн комедия гинэ учкемез потэ, калык театре шутэтскыны ветлэ шуыса. Нош Москваын котькыӵе спектакльёс пуктыло, калык комедие но драмае огкадь ветлэ. Нош татын тросэз шузи, серемес спектакльёсты гинэ ярато. Туж жаль, театре егитъёс ичи ветло, но эшшо но жаль, зэмос удмурт произведениос быро, соос ӧвӧл… Номыр пуктыны луэ ини…

Максим Князев

Анае но атае

Огшоры адямиос. Анае — Вера Анатольевна — музыкая дышетӥсь, атае — Владимир Леонидович — сельской администрациысь водитель. Котькуд адями аслаз нылпиеныз данъяське, дыр. Мынамъёсыз но сыӵеесь ик. Ачим но туж гажасько соосты.

Маскаос сярысь

Мон кышкасько мукет адямилы быдэсак усьтӥськыны, кышкасько монэ пӧялозы шуыса, соос, кинъёслы мон юн оскисько. Таӵе кышканъёс вань адямиослы тупало, дыр, мынам геройёсылы но, мыным гинэ уг.

Максим Князев