Надежда Сапожникова
Удмурт Image

Надежда Сапожникова

1403 {num}

Надежда Сапожникова вордскемын Алнаш ёросысь Туймыйыл гуртын. Можга педколледжез йылпумъямез бере УдГУ-ын педагог-психологлы дешетске. К. Герд нимо гимназиын удмурт кылэн дышетӥсь луыса ужа.

Надежда Сапожникова

— Надя, егитъёс пӧлын тонэ дизайнер шуо. Стилизованной удмурт дэремъёстэ тодо. Ку та удысэн тунсыкъяськыны кутскид?

— Зэмзэ вераса, удмуртсэ гинэ уг, пӧртэм дӥсь вурисько, но удмуртъёссэ ӵемгес вурыны куро. Этно али модно, соин озьы потэ, дыр, удмурт дӥсь гинэ вурисько шуыса. Та удысэн пичи дырысен тунсыкъяськисько. Анае вуриськись, со котырын весь бергасько вал, но вуриськисьлы дышетскеме ӧвӧл. Нош удмурт дӥсен, «Шунды» огазеяськонэ пырыса, «Шундыкаре» вуыса тунсыкъяськыны кутски. Вурисько ваньзэ: юбкаос, кофтаос, пыдэ пононъёс, выл дӥсьёс но мукет, но ӵемысь, куремзыя, дэрем, чыртывесь, суйпоскес вурылоно луэ.

Надежда Сапожникова

— Удмурт шӧмо дӥськут калык пӧлын вӧлмытыны шуг-а? Кин ужъёстэ басьтэ?

— Вӧлмытыны секыт ӧвӧл. Ымысь-ыме «радио» туж умой ужа. ӟучъёс но куро ни туала удмурт дӥсь. Ужъёсы ваньмызлы кельшо кадь, соосты дышетӥсьёс, журналистъёс, кивалтӥсьёс, студентъёс но пӧртэм адямиос басьто. Ӵемысь артистъёс вазисько.

— Стилист луыса но удмурт эстрадаысь артистъёслы юрттӥськод.

— Удмурт мероприятиосын эшъёсы, тодмоосы я причёска лэсьтыны, я сцена вылэ потыны костюмъёс вурыны куро. Сыӵеос пӧлын Алина Антонова, Марина Галичанина, Алёна Тимерханова но мукетъёсыз. Ваньмыз кутскиз Марина Галичанина бордысен, кык ар талэсь азьло. Синмысь синме, пельысь пеле, озьы ӵемгес ӧтчаны кутскизы. Маин быгатӥсько, котьку юрттыны дась. Таӵе уж но мыным опыт, дышетскон. Асме пӧртэм удысын адӟыны яратӥсько, соин котькудаз азинскыны тыршисько.

Трос дырме висъясько удмурт кылэз дышетонлы, проектъёс бордын ужанлы. Уже туж кельше, соин пӧртэм методикаосты эскерисько. Дышетӥсьёслэсь тодон-валанзэс будэтонъя институтэн ӵош удмурт кылын программа гожъяны юрттӥсько. Тани али удмурт кылэз, этнокультурной компонент вылэ пыкиськыса, дышетон бордын ужасько, бадӟым группалы ужан тетрадьёс кылдытон сярысь малпаськисько, но пиналъёсын удмурт праздникъёс ортчытон сценарийёсын бичет кылдытӥсько. Та али валтӥсь уже. Вуриськыса вис карылӥсько, ужме вошъясько, огез но акыль потыса уг вутты, соин ик кыказ но мыло-кыдо ужасько.

— Удмурт кыллэсь азьланьскемзэ адӟиськод-а?

— Удмурт кыл азинске, но, мынам малпамея, сюбег ӧрен. Куке но паськыт, вӧлмыт кутӥськоз меда… Сое азинтон понна Удмуртиысь калыклэсь, ӟучъёслэсь но асваланзэс воштоно. Удмурт кылэз дышетон программа пыртоно вылэм школаосы но нылпи садъёсы. Мынам трос ӟуч пиналъёсы, анай-атайёссы но ӟучесь, соос кык кунгожсьӧр кылэз дышето, ар ортчыса, тросгес кылъёс тодо но валало, кылъёсты герӟаса вераны секытгес ай, но мылысь-кыдысь дышетскись пиналъёс вань. Тросэз дышетӥсь, воспитатель бордысь потэ: кызьы со пиналъёсты дышетоз, кызьы анай-атайёсты ӝуткалоз, удмурт кыллэсь но лулчеберетлэсь кулэлыксэ, чеберлыксэ возьматоз-пыӵатоз.

Надежда Сапожникова

— Кызьы удмурт кылэз пиналъёслы яратон мылкыд пыӵатӥськод?

— Пиналъёсмы ӟучесь, соин, 2—3 ар ӵоже дышетыса, умой вераськыны секытгес ай, вань удмурт кылын вераськисьёсыз но. Таосыныз анай-атайёс умой ужало. Озьы ке но мылысь-кыдысь, бызьыса ик удмурт кабинетэ пыро. Анай-атайёслэн кылэз дышетыны мылкыдзы сярысь верано ке, таӵеослы Настя Дэметэр-Петроваен малпамын «Шудон корка» проект. Али сое мон нуисько. Татын чакламын языковое погружение: удмурт кылын гинэ вераськоно, калык выжыкылъёсын, кибашлы адямиосын тодматскиськом, мастер-класс ортчытӥськом, удмурт калык шудонъёсын шудӥськом. Элькунысьтымы тодмо адямиосты ӧтчаськом, соос ӵем пиналъёсты маин ке паймыто но синъёссэс ӝуато. Нылпиос понна котькуд тунсыко адями — выль усьтон. Соин та ужын вань быгатонлыкъёс кулэ луо: суредаськон но, киужен вырон, удмурт кылэз яратон.

Надежда Сапожникова