Наталья Буранова
Удмурт Image

Наталья Буранова

306 {num}

Наталья Буранова – Удмурт Элькунысь Кун йӧскалык театрысь драмая артист, пӧртэм ужрадъёсты нуись, кырӟась. Йылпумъяз М. С. Щепкин нимо Вылӥ театръя училищеез. Вордскемын Алнаш ёросысь Варзи-Ятчи гуртын, али Ижкарын улэ.

Лулчеберетэ нырысетӥ вамышъёсы

Ваньмыз школаысен кутскиз, дыр. Пӧртэм концертъёсы, ужрадъёсы пыриськи, сцена вылын  рольёсты шудӥ. Бен, артист луэме потӥз, нош со льӧль малпанэ гинэ вал.  УдГУ-ысь удмурт кылосбуръя факультетэ пырем бере ваньмыныз люкиськоно луиз. «Котьку уд лоба, инмысь музъеме васькыны кулэ», – шуыса малпай. Майбыр улонэ кема ӧз кыстӥськы. Газетысь ялон возьматӥзы – Щепкин нимо Вылӥ театръя училищее вуоно артистъёсты, пе, люкаськом. Асме эскереме потӥз но кылзонэ пыриськи. Чик ӧй малпа, вань вожвылъяськонъёсты ортчо шуыса. Бадӟым шумпотон вал со.

Москваын дышетскон

Монэ, пичи удмурт гуртын будэм нылэз бадӟым каре вайизы. Соин ик нырысетӥ толэзьёсы ваньмыз секытэн сётӥськиз. Россилэн шоркараз  улон «пӧзе», калык кытчы ке бызе,  ваньзэ валаса ик уд вуы. Щепкин нимо Вылӥ театръя училищеын но капчи ӧй вал. Быръем ӧнере валантэмгес потӥз. Нош дышетӥсьёсы актёр профессилы синмаськытыны быгатӥзы. Дыр ортчемъя ини ваньмызлы дыши, театр улонэ выйи.Та лулчеберет удысын  тыршон, чидан но котькуд нунал ас бордад ужан кулэ. Офелияез (У. Шекспир «Гамлет, принц датский»), Лизаез  (Ф. Абрамов «Две зимы и три лета»), Еленаез (У. Шекспир «Сон в летнюю ночь»), Софьяез (Д. Фонвизин «Недоросль») шудэм рольёсы али но йыре кылемын.

Удмурт театр дунне

Котькыӵе ролез шудэм бере зэмос улонэ потыны секыт. Доре бертӥ ке но сцена вылын шудэм героинялэн  вужерез сьӧрам ветлэ кадь, верам кылъёсыз йырысь уг кошко.  Яратӥсько сыӵе рольёсты. Н. Островскийлэн «Гроза» пьесаысьтыз Катеринаез шудыны  кельше. Солэсь вань мылкыдъёссэ, сюлэм висёнъёссэ, малпанъёссэ ачим пыр поттӥсько. Мон понна та туж висьымон роль. Героинялэсь пуш дуннезэ шӧдоно, нош Островскийлэн гожтосэзлэсь – философизэ. П. Захаровлэн пьесаезъя пуктэм «Чупчи крезь» спектакльын валтӥсь ролез – Эбгаез – шудӥ. Валлин дырын улӥсь нылкышнолэн философиез аспӧртэмлыко. Соин та образэз вылам дӥсяны секытгес потӥз. Роль – со пичи нуны кадь. Нырысь  пушкын кылдэ. Собере  нуллӥськод, вордӥськод, котькуд спектаклен будэтӥськод но быдэс улонад бордысьтыд лэземед уг луы.   Инмар сётэмен мон театрын ужасько. Озьы ик кулэ вал, дыр. Элькунэ но калыке понна котьку тыршыны дась!

Крезьгур котырын

Асме профессиональной кырӟась шуыны уг быгатӥськы. Училищеын академической кырӟан быдэстонъя гинэ занятиос вал. Отысен ик куараен ужан амалъёсын тодматски. Ижкаре бертыса  ини, Геннадий Иванович Бекманов кырӟаны быгатонлыкме синйылтӥз.  Яратоно кырӟанъёсы – «Эн ӟыгыртылы мукетсэ» но  «Тон мынам бадӟым шудэ».  Нош зэмзэ ке верано, классической кырӟанъёс матынгес пото.  

Дыры луыку…

Лыдӟиськыны яратӥсько,  со  театрлэсь шутэтскыны юрттэ. Озьы ке но, книгаысь кельшись героиняез ас вылам но мертасько. Куке  со сереме но потэ ини. О. Генрилэн, Ги де Мопассанлэн, М. Булгаковлэн, Л. Толстойлэн гожтэмъёссы кельшо. Анна Каренинаез но Наташа Ростоваез шудысал. 

Учкись интыын

Кино но театр удысын адӟем карымон адямиосы ӧвӧл кадь. Нош кӧня ке яратоно артистъёсы вань, кудъёссэ  учкыны яратӥсько: Вивьен Ли, Ингрид Бергман, Элина Быстрицкая. Кемалась ӧвӧл 
нырысьсэ балетэ ветлӥ. Мон валай, со туж аспӧртэмлыко лулчеберет шуыса. Паймымон: балет артистъёс эктон выросъёсынызы постановкалэсь пуштроссэ  учкисьёс доры вуттыны  быгато.

Азьланезлы малпанъёсы

Театрын вань рольёсме ӧй на шуды. Та лулчеберет удыс – мынам улонэ. Асме сотэк уг адӟиськы, шудэм героиняосын люкиськыны уг быгатӥськы. Нош сцена вылын выль кырӟанъёсме ӧй на быдэсты…