Никита Моисеев
Удмурт Image

Никита Моисеев

1568 {num}

Никита Моисеев – киноя но театръя актёр, режиссёр, эктӥсь, кырӟась, модель. М. С. Щепкин нимо вылӥ театръя училищеез йылпумъяса, Удмурт Элькунысь йӧскалык театрын артист луыса ужа, нылпиосты актёр мастерстволы дышетэ, «АЖИОТАЖ» студиын хореографиез дышетэ но туспуктэмен выре, со сяна пӧртэм ужрадъёсты нуэ, вожвылъяськонъёсы пыриське.

Улон сярысь

Мон тодӥсько, мар со, куке сиён ӧвӧл, сиськыны но куддыръя уксё ӧй вал. Машина но дас аресысен миськи. Анай-атайёсы туж яратыса будэтӥзы монэ, котьку ваньзэ тыршо вал мон понна лэсьтыны. Соос ӟечлыкез, ог-огдэ гажанэз сюлмам пыӵатӥзы. Мар со сыӵе яратон, мон валасько. Соин матысь адямиослы осконо, яратоно, гажано но ноку соосты вунэтоно ӧвӧл.

Армия

Зэмзэ ке, армия валан сётэ: котькуд минуттэ пайдаё ортчытоно. Куке реактивной самолёт ИЛ-76 ог 400 пала скоростен мынэ, куке 20 секунд куспын 50 адями тэтчыны кулэ, куке парашют усьтӥське, куке лобись самолётлэн осезлэсь тӧлъя берытсконо, учкыкуд мукет парашютистэн шуак омырын медад герӟаськы шуыса, соку быдэс улонэд син азьтӥд кошке... Мыным али парашют сётӥзы ке, мон ворсам синмыным сое бичаны быгато.

Театр но кино

Театрын зол куараен, эмоциосын диалогъёс пыр тросгес ужано ке, киноын улонын кадь ик шудоно, татын ини камералэсь уд пегӟы, со ваньзэ синйылтэ. Актёрлэн синъёсаз ваньмыз адӟиське, осконо-а солы, ӧвӧл-а, рользэ шудыкуз. Камера азьын но ужаны быгатоно, ракурсъёсты шӧдоно. Киноын шудыку, персонажлэн улонэз пыр потоно, шӧдоно сое, геройлэсь пуштроссэ возьматыны кыӵе ке амалъёс утчано. Нош со капчи уж ӧвӧл.

Ужъёсы

Щепкаын произведениосысь актъёсты пуктылӥмы. Мынам вал таӵе рольёсы: Жадов (А. Н. Островский «Доходное место»), Чацкий (А. С. Грибоедов «Горе от ума»), Лизандр но Заморыш (У. Шекспир «Сон в летнюю ночь»). Туж тунсыко потӥз Ганичевлэсь рользэ (Ф. А. Абрамовлэн «Две зимы, три лета» романэзъя) шудыны: воксё ӟызымем уксё бичасез, очкиен, кортлэсь пинъёс пуктылэм персонажез.

Кыкетӥ курсысен пӧртэм кастингъёсы ветлыны кутски. Сериалъёсы ӧтчаны кутскизы. Нырысетӥ сериалэ «След» нимаськиз. Тросэз актёръёс татысен кутскизы киное сюрессэс. Собере шудӥ на «Верное средство», «Универ», «Зайцев + 1», «Интерны» сериалъёсын. Озьы ик туж кельшиз дубляжен вырыны. Мыным шуд усиз «Морской бой», «Мадагаскар-3», «Хоббит, туда и обратно» но мукет фильмъёсысь эпизодъёсты озвучивать карыны.

Туннэ нунал сярысь

Зэмзэ верано ке, мыным та дыре ваньмыз тунсыко. Улӥсько озьы, котькуд нунал берпуметӥез луыны быгатэ шуыса. Кин тодэ, мар милемыз возьма ӵуказе. Аналскыны аслым маза уг сётӥськы, ӵукнаысен ӝытозь оломаин но вырисько. Нош нунал пумын малпасько, мар пӧрмиз, мар бордын ужано на, мар эшшо выльзэ луоз лэсьтыны мукет нуналэ.

Азьланезлы малпанъёсы

Режиссёрлэн ужез монэ кыске. Театрмылы выль адӟонъёсын туала режиссёръёс кулэ, соос ӧжыт. Кино бордын но тунсыко ужаны. «Инвис» кинопоттониез вылӥ уровене ӝутэме потэ. Москваысь режиссёръёсын но продюсеръёсын ӵош выль проектъёс лэсьтысал.