Светлана Ерёмкина
Удмурт Image

Светлана Ерёмкина

559 {num}

Светлана Ерёмкина – туж паймымон удмурт нылаш. Вордскемын Оренбургын. Кӧня ке дыр ӵоже семьяеныз Кезын улэмын. 2010-тӥ арысен Ижкаре интыяськиз. Йылпумъяз Удмурт кун университетысь журналистика факультетэз. Али удмурт компаниосты кунгож рынокъёсы поттон удысын тырше.

Нырысетӥ вамышъёс

Пинал дырысеным ик улонэ «пӧзиз»: пӧртэм конференциосы пыриськылӥ, олимпиадаосы ветлӥ. Литератураен, кылъёсын, химиен но биологиен тунсыкъяськи.  Озьы ик  радиопередачаосты гожъяй, школьной газет бордын ужай.  Кема малпаськоно луиз, кыӵе ӧнерез быръёно: эмчи яке журналист…  Творческой палы вормиз, соин ик  Удмурт кун университетысь журналистикая факультетэ пыри. Бен, улонын номыр огшоры уг луы. Тае мон ачим но шӧдӥ ини.

Азьлань сюресэ

Кӧня ке дыр ӵоже кун газет-журналъёсын но федерал веб-порталъёсын ужай. Соку валай, тодон-валанъёсты пӧртэм удысъёсын паськытатоно но узырмытоно шуыса. Со понна ик, курсъёсын но мастер-классъёсын визьнод люкай, берыктӥсьлы но кивалтӥсьлы  дышетски. 
  
Наукаен вырыны но тунсыко потӥз, кӧня ке научной гожъямъёсы но люкаськизы ни.  Тыршеме мултэс ӧз луы, ваньмыз  азьланьтӥськыны юрттӥз.

Быръем удысэ сярысь

Мон али удмурт компаниосты  кунгож рынокъёсы поттон удысын тыршисько.  Ми азьын кулэ луись ужъёс пуктэмын: кунгож бизнес-миссиос дасян, калыккуспо адӟытонъёс радъян,  маркетинг эскеронъёс но семинаръёс ортчытон но трос мукет. Мон уженым туж данъяськисько: пӧртэм элькунъёсысь ӧнерчиосын пумиськисько, кылэз юнматӥсько, бадӟым ужрадъёсы пыриськисько.

Азьланез сярысь трос вераськыны луэ. Али дырез котьку валан понна выль тодон-валан кулэ луыны. 
Со сяна, уж бурдъяны кулэ!  

Ваньмон дыры

Берло дыре ӵемгес сюрес вылын гожъяськисько – адями сярысь очеркъёс, интыос но ужрадъёс  сярысь вакчи гожтосъёс (эссе, зарисовкаос).  Гожъяськыса пуш малпанъёсты, дунне шӧдонъёсты, сюлэм шуг-секытъёсты возьматыны луэ.  Со сяна, лыдӟиськыны яратӥсько. Луонлыкъя тренажёр залэ ветлӥсько. Кельше  тазалыко сиён пӧзьтыны, таин мон мылысь-кыдысь вырисько. Пӧртэм калыкъёслэн кухняоссы тунсыко пото. 

Ижкар сярысь

Ижкарлэн тусыз но  заводъёсыз сокем ик уг возьмато карлэсь «дуннезэ».  Адямиос пыр гинэ валаны луэ шаерлэсь шудбурзэ. Соин ик  Ижкар – бадӟым луонлыкъёсын пичи инты, кытын адямиос ас ужзэс тодо, сое лэсьтыны тыршо ӟечгес. Мон Оренбургын вордскемын ке но, Удмурт шаерез яратӥсько.  

Удмурт кыл

Удмурт кыл – кузь тол ӝытъёсы ӵыжы-выжыосын вераськон, дэмен пельнянь лэсьтон но песянайёслэн турнан вакытэ небыт но жингрес кырӟанъёс быдэстэмзы. Анай кылэз но лулчеберетэз тодон юртто астэ валаны но пуш дуннедэ узырмытыны. Соос выль азинсконъёслы кужым сёто.