Светлана Ручкина
Удмурт Image

Светлана Ручкина

222 {num}

Светлана Ручкина – одӥгез тунсыко но аспӧртэмлыко туала кырӟась. Тросэз тодо сое Ladi Sveti, «Silent Woo Goore» группалэсь солистказэ сямен. Вордскемын Алнаш ёросысь Асан совхоз-техникум черкогуртын.

Лулчеберет дуннеен  тунсыкъяськонэ

Ваньмыз кутскиз, дыр, нылпи садысен: отын мон пӧртэм эктонъёс быдэсъяй.  Со лулчеберет  сюресэ нырысетӥ вамыше вал. Собере дышетскыны кутски крезьгуръя школаын: хореография но фортепиано специальностьёсъя.  Отысен дышетӥсе шӧдӥз кырӟаны быгатэмме. Со пӧртэм вожвылъяськонъёсы пыриськыны дэмлалляз. Нырысетӥ вормонъёс басьяны кутски, озьы ик кырӟан удысэ «выйи». Зэмзэ верано ке, мон ноку но кырӟась луо шуыса ӧй малпа. Озьы пӧрмиз – улонэ сценаен герӟаськиз. Мон лэсьтӥсько сое, мар мыным кельше но тунсыко потэ. Адямилэн косэмезъя гинэ улыны уг быгатӥськы. Соку мон уг луы ини со мон.

Кырӟанъёсы сярысь

Мон уг быдэсъяськы кырӟанъёсты, кудъёссэ  уг валаськы, кудъёсыз  пуш дуннеелы тодмотэм пото. Одӥг кылэз басьтӥ ке но, мон солы туж бадӟым инты висъясько. Солэн но вань ук аслаз пуштросэз, кудзэ валаны, шӧдыны, кылзӥсьлы вуттыны быгатоно!  Кырӟанъёсы – со пичи историос, кудъёсыз возьмато мынэсьтым яке эшъёсылэсь улон-вылонзэс, куректон-шумпотонъёссэс, малпанъёссэс. Кылсярысь, «Выль кен» кырӟан нимысьтыз сюанлы гожтэмын вал. Татын шараямын вань мылкыдъёсы, кудъёссэ  со дыре шӧдӥ.  Мынам малпамея, кырӟанын ваньмыз умой луыны кулэ: кылъёсыз но, крезьгурез но. Жаляса верано, кырӟан кылъёс  гожъяны уг пӧрмытӥськы – удмурт кыллюкаме туж пичи. Эскерисько асме крезьчи удысын. 

«Silent Woo Goore»,  Ladi Sveti но мон

Та кык проектъёс ог-огзылэсь туж висъясько. «Silent Woo Goore» группаын мон копак ачим, инкуазьлэн нылпиез кадь.  Нош Ladi Sveti – со капчи, егит туала ныллэн образэз. Татын асме котькызьы возьыны багатӥсько. 
Нош зэмос улонын мон мукет.  Уг яратӥськы мыняса, маялляськыса ветлыны. Куд-ог адямиослэсь палэнскисько, вераськыку бадӟым вис возисько, сюлэмме ворсасько. Нош кинъёсын мыным капчи потэ, соосын огкылысь шулдыр вераськисько. Валасько, со оскымон адями, шуг-секытъёс луизы ке, одно юрттоз.  Нош дорын мон воксё пичи ныл кадь, кудӥз  анай-атайзэ ӟыгыръяны яратэ. Бен, озьы!  Ӵужанае «эрки писэй» шуэ вал монэ.  Ми, куинь нылпиос, будӥмы сыӵе семьяын, кытын «яратон» кыллэсь зэмос пуштроссэ валаны дышетӥзы.

«Камали» студия

Та ужрадэ Анатолий Эркишев пыриськыны ӧтиз. Мон пумит ӧй луы. Татын нылпиосты кырӟаны дышето. Кык группалы люкимы кырӟаны дышетскись пиналъёсты. Озьы ик ужаськом. Умой луысал, куке пиналъёс эктыны но, кыӵе ке крезьгур инструментэн но шудыны  дышетскысалзы ке. Жаляса верано, милям озьы ӧвӧл. 

Яратӥсько… уг

Мон уг яратӥськы кылзыны «Silent Woo Goore»-ез. Мон сямен, сое сцена вылын гинэ кылзоно. Мукет интыын со уг тупа. Нош Ladi Sveti-лэсь кырӟанъёссэ  сцена вылын быдэсъяны уг кельшы.   Соос умой луысалзы дискотекаосын, пӧртэм шулдыръяськон ужрадъёсын.  Нош кылзыны туж яратӥсько. Тӥни сыӵе адями мон! Али туж трос умой кырӟасьёс, группаос. Али кельшыны кутскиз «ONUKA» группа. Мынам но соослэн кадь ик крезьгуръёсы мед луысалзы.

Шутэтскон

Аслэсьтым ачим юасько: «Вань-а мынам шутэтскон дыры?»  Нуналысь нуналэ ужын «пыжисько»: «Silent Woo Goore»-ын репетиция, «Ladi Sveti»  проект, «Камали» студия... Секыт ваньзэ лэсьтыны. Куддыръя малпасько: кудӥныз ке но люкиськоно. Семьялы но бадӟым инты кельтоно ук. Шумпотӥсько, мынам кузпалэ ваньзэ вала, чида шуыса. Сотэк мыным туж секыт луысал. Бадӟым тау солы ваньмыз понна!  Шутэтскон дыръёсам яратӥсько эшъёсыным пумиськыны, пӧртэм интыосы вуылыны.  Анай-атае сярысь но уг вунэтӥськы: ӵемгес бертаны тыршисько.